Հայկական Պաշտօնական Եւ Ժողովրդային Մասնակցութիւն` Ֆրանչիսկոս Քահանայապետի Պաշտօնի
Ստանձնման Արարողութեան
Հ Հ նախագահ Սերժ Սարգսեան, երէկ Վատիկանի մէջ ներկայ գտնուեցաւ Նորին Սրբութիւն Ֆրանչիսկոս
Քահանայապետի պաշտօնի ստանձնման պատարագին: Հայրենի նախագահը շնորհաւորեց սրբազան քահանայապետը
անոր ընտրուելուն եւ կաթողիկէ աշխարհի հովուապետի առաքելութիւնը ստանձնելու առիթով: Ան
նշեց, որ աշխարհի մէջ առաջինը պետականօրէն քրիստոնէութիւնը ընդունած հայ ժողովուրդին
համար այս իրադարձութիւնը առանձնայատուկ խորհուրդ եւ իմաստ ունի: Նախագահը ուրախութեամբ
նշեց, որ Ս. Պետրոսի նուիրապետական աթոռին վրայ նստած է հայ ժողովուրդի բարեկամը, որ
քաջատեղեակ է հայ մշակոյթին եւ հայոց պատմութեան, ինչ որ ան բազմիցս փաստած է Արժանթինի
մէջ իր գործունէութեան ընթացքին: Յայտնենք, որ Վատիկանի մէջ Ֆրանչիսկոս Քահանայապետի
Պետրոսեան պաշտօնի ստանձնման արարողութեան ընթացքին ուշագրաւ էր նաեւ Ս. Պետրոսի հրապարակին
վրայ հայ հաւատացեալներու ներկայութիւնը, որոնք բարձրացուցած էին Եռագոյն դրօշակներ: